Hîwa Megrî هیوا مەگری

هیوا مەگری، هەنسکی نیوەشەو بەس هەڵدە بەس بگری
لە چاوی بێقەرارم بۆچی دەرمانی وەنەوز ئەبڕی؟
کوڕی خۆم، کۆرپەلەم، میوانی دنیای تازەخوڵقاوم
ئەدا گریەت بە زەربەی چز لە ڕۆحی پڕگلاراوم

چییە ئەم گرییە بێغایە کڕووزەیی نیوەشەو خورپێن؟
چییە ئەم قەترە وردانەی لە چاوت بێ مەئال ئەڕژێن؟
لەگەڵ ئەو خونچە ساوایەی لەسەر خەڵفی بەهار ئەڕوێ
چییە فەرقت؟ لەبەر چی ئەو هەتاکوو سیس ئەبێ ئەنووێ؟
چییە کۆرپەم، چ سڕێکە وەها مەحکومی گریانی؟
کە تۆ هێشتا لە خەم ناگەی، لە مانای گریە نازانی

ئەگەر وەک دایکە* حەسرەت دیدەکەت ڕەنجت بچێژایە
زەمەن گەردی ئەمەلتی گشت بە دەم باوە بپێژایە
هەقت بوو عەرش بلەرزێنی بە ناڵەی ڕۆحی پڕئێشت
لە ئەستێرەی سەما بپژێنی فرمێسکی دڵی ڕێشت
بە خۆڕایی مەترسە، خەم مەخۆ، مەگری لە ئێستاوە
بە چی دیارە کە چی لەو تەختیبناوچەوانە نووسراوە؟

هۆنراوە: گۆران
* (گۆران وەهای نووسیوە: ئەگەر وەک باوکە....)

Hîwa megrî, heniskî nîweşew bes hellde, bes bigirî
Le çawî bê qerarim boçî dermanî wenewz ebirrî?
Kurrî xom, korpellem, mîwanî dinyay taze xullqawim
Eda giryet, be zebrî çiz, le rohî pirr gilarawim

Çî ye em giriye bê xaye, kirrûzey nîweşew xurpên?
Çî ye em qetire wirdaney le çawit bê meal errjên?
Legel ew xunçe sawayey le ser xellfî behar errwê
Çî ye ferqit? le ber çî ew hetakû sîs ebê enwê
Çî ye korpem? çi sirrêke weha mehkûmî giryanî?
Ke to hêşta le xem nagey, le manay giriye nazanî

Eger wek dayke* hesret dîdeket rencit biçêjaye
Zeman gerdî emeltî gişt, be dem bawe bipêjaye
Heqt bû ’erş bilerzênî, be nalley rohî pirr êşit
Le estêrey sema bipjênî firmêskî dillê rêşit
Be xorrayî metirse, xem mexo, megrî, le êstawe
Be çî diyare ke çî lew textî nawçawane nûsrawe?

Hozan: Goran
* (Di deqê resen de Goran wisa nivîsandî ye: Eger wek bawke...)