Şeş Pepûle شەش پەپوولە

شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
هەر بۆ ئێوە لێوبەباری خەمم
بولبوولی بەستە و گریە و ماتەمم
هەر وەکوو پایز ڕەنگزەردی ئێوەم
داخی دەروون پڕ لە دەردی ئێوەم
خەمی ئێوەیە خەو و خۆراکم
شەوی تاریکە ڕۆژی ڕووناکم
بەرد ئەسوتێنێ گەرمی هەناسەم
بە سۆزی دڵ و ئاگری تاسەم
هاوار و ناڵەی مات و بێدەنگم
خورپە و لێدانی دڵەکەی تەنگم
شەش پەپوولەکەی گۆشەی باخەکەم

شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
لەو ڕۆژەوە من دوورم لە ئێوە
هەر خۆم ئەزانم دڵ چەن پەشێوە
هەر خۆم ئەزانم کام بڵێسەی خەم
لە دەروونەوە بەربووەتە جەستەم
هەر خۆم ئەزانم دەردی دڵی خۆم
تخوا با هەر خۆم بۆ خۆم خەم بخۆم
هەر خۆم ئەزانم چەن بەسەرسامی
گرتوومە ملی ڕێی بێئارامی
دەست لەناو دەستی دڵەی ڕەنجەڕۆم
بە ڕێی دڕکاوی مەینەتا ئەڕۆم
شەش پەپوولەکەی گۆشەی باخەکەم

شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
دەستە بە دەستە باخەوانەکان
ئەگەڕێنەوە بەرەو باخەکان
موژدە بێ موژدە، دێمەوە لاتان
ئەکەم بژاری باخچەی هیواتان
شاد ئەبینەوە ئەمڕۆ یا سبەی
ئاوات، خۆزگە، خەو ئەبن بە ئۆخەی
ئەژین ژیانێ هەمووی ئۆخەی بێ
هەرچی پێی بڵێی خەفەت ئەو نەیبێ

پەپوولەکانم، پەپوولەی ئازیز
وا بەسەرئەچێ ماتەمی پایز
شەش پەپوولەکەی گۆشەی باخەکەم
شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
هەر بۆ ئێوە لێوبەباری خەمم
بولبوولی بەستە و گریە و ماتەمم
هەر وەکوو پایز ڕەنگزەردی ئێوەم
داخی دەروون پڕ لە دەردی ئێوەم

هۆنراوە: کاکەی فەلاح

Bi tîpêm latînî:

Şeş pepulekey goşey baxekem
Her bo êweye ax û daxekem
Her bo êwe lêw bebarî xemim
Bulbulî beste û girye û matem
Her wek payz reng zerdî êwem
Daxî derun pirr le derdî êwem
Xemî êweye xew û xorakim
Şewî tarîke rojî rûnakim
Berd esutênê germî henasem
Be sozî dill û agirî tasem
Hawar û nalley mat û bêdengim
Xurpe û lêdanî dillekey tengim
Şeş pepulekey goşey baxekem

Şeş pepulekey goşey baxekem
Her bo êweye ax û daxekem
Lew rojey dûrim le êwe
Her xom ezanim dill çend peşêwe
Her xom ezanim kam bilêsey xem
Le dar û newa berbote cestem
Her xom ezanim derdî dillî xom
Tuxwa ba her xom bo xom xem bixom
Her xom ezanim çend besersamî
Girtûme millî xirey bê aramî
Dest le naw destî dilley rencerrom
Be rê dirrkawî meyneta errom
Şeş pepulekey goşey baxekem

Şeş pepulekey goşey baxekem
Her bo êweye ax û daxekem
Deste be deste baxewanekan
Egerrênewe berew baxekan
Mijde bê mijde dêmewe latan
Ekem bijarî baxçey hîwatan
Şad ebînewe emro yan sibey
Awat xozge xew ebê be oxey
Ejîn jiyanê hemûy oxey bê
Herçî pê billêy xefet ew neybê
Pepulekanim, pepuley azîz
Wa beser eçê matemî payz

Hozan: Kakey Felah